Soos ek dit sien – Wat ‘n vriend

“Juffrou, niemand wil met my speel nie. Ek het nie ‘n maatjie nie.” Mari vertel dikwels hoe moeilik dit vir die kleintjies is as hulle voel hulle het nie maats nie. Ek kan my indink. Jy is by die groot skool en jy is alleen. Nie lekker nie. Dit is waar vir ons almal. In die groot skool van die lewe moet jy maatjies hê. Familie en vriende is waarskynlik twee van die belangrikste groeperinge wat ons lewens vol en ryk kan maak en ons help om die houe van die lewe te vat wanneer dit kom. Dit is ongelukkig heel maklik om hierdie waarheid te verontagsaam en aan te gaan met jou lewe. Daar is elke dag baie om te doen en tyd bestee aan vriende word maklik ‘n luukse. Veral as jou vrou nog jou beste vriendin ook is, ontdek jy op ‘n dag dat jy jou vriende verwaarloos het. Dit is dom. “Dwaas”, sou Spreuke sê.

Dit was dié soort gedagtes waarmee ek my op ons lang vlug terug van die VSA besig gehou het. Ons kuier saam met ou vriende wat spesiaal Boston toe gery het sodat ons kon saamkuier, was vars in die geheue. Vriende wat alles van jou weet en nogtans van jou hou. Wat verstaan wie jy is sonder dat jy iets hoef te verduidelik. Al het ons in verskillende rigtings gegroei en al is ons nie meer dieselfde as 30 jaar gelede nie, is die gedeelde verhaal steeds daar. Die begrip vir mekaar kom so maklik. Ek het besef hoeveel ons hulle mis en hoe ons lewens armer sonder hulle is. ‘n Mens moet vriende nooit as vanselfsprekend aanvaar nie. Nie net die wat ver weggetrek het nie, maar ook die wat rondom jou is. Dit is opvallend hoe hoog die Spreukeboek vriendskap aanskryf. Veral die vriend wat jou ‘n eerlike antwoord gee en by wie jy steeds veilig voel.

Ek is dankbaar dat ‘n gemeente ook ‘n ruimte is waar ‘n mens kan vriende hê al het ons in ons tyd geleer dat dominees nie in die gemeente mag vriende hê nie! Kan jy glo?!

En nog meer merkwaardig is die feit dat ons in die kerk kan sing “Wat ‘n vriend het ons in Jesus.”

James Kirkpatrick

 

  • Facebook
  • Twitter
  • email
  • Google Bookmarks
  • Print
  • PDF
This entry was posted in Algemeen. Bookmark the permalink.